MIRROR成員丨姜濤生日推出新歌《好得太過份》　答謝姜糖不離不棄

4月30日是MIRROR萬人迷姜濤的25歲生日，他雖然人在新加坡，為準備明天的《MIRROR FEEL THE PASSION CONCERT TOUR 2024》巡迴演唱會新加坡站外，同時亦與MIRROR各成員齊接受當地傳媒訪問，在工作中度過，不過他早前特別製作第15胎《好得太過份》，並於生日當日推出，送給一眾Fans。
 
《好得太過份》由徐浩作曲、陳詠謙填詞，是繼《愛情簽證申請》後再次跟陳詠謙合作的個人單曲作品。

MIRROR成員︱姜濤25歲正日生日　過千名姜糖中午齊集銅鑼灣場面熱鬧

▲ 姜濤推出個人新歌《好得太過份》。

感謝姜糖默默付出

過去姜濤聽過很多Fans對他默默付出的故事，其中一個印象特別深刻，說：「我聽過一個故事，有個Fans Keep住舉牌，但因為大家都舉住牌佢見唔到我，但佢覺得好值得，仲話見唔到我唔緊要，最重要係我要見到佢舉住嗰個牌，令我安心。呢件事大家聽完，連工作人員都覺得想像唔到。」

所以他在去年的演唱會上，拍下自己舉應援燈牌的短片，回想那次拍攝，姜濤稱：「大家見Fans出 Event 舉牌好似好容易、一瞬間嘅事情，都唔係好辛苦，但佢哋為咗舉牌呢個行動，可能要付出好多時間，提前去排隊，又拎住咁多嘢，但佢哋只係想話俾你聽佢哋喺度嘅時候。喺安靜嗰一排，我就係諗咗好多呢啲嘢，然後好想話俾大家聽，你哋對我太好喇，真係好得好過份，好感激佢哋由以前到而家，無論我發生乜嘢事情，經歷咗乜嘢低谷，佢哋都會喺度。」《好得太過份》亦因此而誕生。

▲ 姜濤推出個人新歌《好得太過份》。

姜濤喜歡收粉絲來信
 
今次拍攝MV時，姜濤拿來大量Fans寄給他的信件作為道具，他表示其實很喜歡收到Fans的來信，說：「不嬲都鼓勵Fans寫信俾我，唔使嘥太多錢去送好多禮物俾我，因為你哋寫信俾我，我已經接收到你哋內心嘅想法，呢個重要過禮物。」

被問到當中可有一些內容十分深刻，姜濤說：「令我印象好深刻嘅有太多，好似前幾日都睇到一封，佢話佢係單親媽咪，帶住幾個小朋友，唔知而家點做，只可以去聽我嘅歌去支撐住佢。」

▲ 姜濤推出個人新歌《好得太過份》。

盼每個人願望成真

他續指：「我唔知自己嘅歌可以有咁大力量，去支撐住人哋，但如果你可以喺我嘅歌入面攞到力量就已經好足夠。希望大家聽完《好得太過份》，可以俾你哋有一個好好嘅力量，呢個係我對Fans嘅感情，但係你都可以透過呢隻歌，話俾你好重要嘅人知： 你都對我好好。」
 
生日雖然要在海外工作中度過，但姜濤心情大好笑著表示：「又到一年一度嘅生日，每一年嘅生日，都漸漸地變到好似唔係我嘅生日，但我好開心，大家會因為我嘅生日而聚埋一齊咁開心。好多謝一直以來支持我嘅Fans，好多謝身邊每一個愛我嘅人。今年生日願望，係希望身邊所有人身體健康，身體係好重要，希望每個人都願望成真，大家開開心心，生活愉快。」

▲ 姜濤推出個人新歌《好得太過份》。

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick Whatsapp頻道睇最新資訊︰http://tinyurl.com/3dtnw8f5